Bi armanca şermezarkirina komkujiyên dewleta Tirk li Bakurê Kurdistanê dike û silavkirina berxwedana xwerêveberiyan, li çiyayê Şengalê meşek hat lidarxistin. Di meşê de pankarte ji navên endamên YPS û YPS Jin ên di şer de jiyana xwe ji dest dan hat hilgirtin û ciwanên Şengalî jî banga tevlîbûna li nava refên YPS'ê kirin.

Meş bi pêşengiya jinan, bi tevlîbûna zêdeyî 500 kesî pêk hat. Jinên Şengalî pankartên ji wêne û navên endamên YPJ Jin ên jiyana xwe ji dest dane hilgirtin û berxwedana YPS Jin silav kirin.

Di meşê de dirûşmên "Kujer Erdogan", "Erdogan û DAIŞ yek e", "Cizîr bimeşe, Şengal bi te re ye", "Bijî Rêber Apo" hatin qîrîn.

Fermandarê Hêzên Parastina Şengalê (HPŞ) Heyder Şeşo jî beşdarî çalakiyê bû û li vir axivî. Şeşo bal kişand ser berxwedana zêdeyî 3 meh in dewam dike û destnîşan kir, ku heta serketinê divê ev berxwedan bidome. Şeşo ji bo serketina berxwedanê jî bal kişand ser girîngiya desteka gel.

Şeşo diyar kir, êşa çar parçeyên Kurdistanê êdî hevpar e û bang li her kesî kir, ku ji bo êrîşên bê pîvan û bê wijdan ên dewleta Tirk bi dawî bibin, zextê li hêzên navneteweyî bikin.