Fermandariya Yekîneyên Berxwedana Şengalê (YBŞ) bi daxuyaniyê cejna Êzî pîroz kir.

Fermandariyê got, "Bi boneya Cejna Rojiyên Êzî, em pîrozbahiyên xwe yên germ li gelê me yê Êzîdî yê berxwedêr û li malbat û dayikên cangoriyan dikin ku îdealên herî bilind ên fedakarî û dilsoziyê temsîl kirine û bi xwîna xwe ya paqij dîrokeke rûmet û berxwedanê nivîsandine. Her wiha em pîrozbahiyên xwe li dostên Êzîdiyan û hemû pêkhate û gelên Iraqê dikin û çarenûs û jiyana me ya hevbeş piştrast dikin."

Fermandariya YBŞ'ê diyar kir ku di vê helkefta pîroz de, ew bi rêz û hurmeteke mezin cangoriyên xwe yên çavnetirs bi bîr tînin, ku bêyî  fedakariyên wana yên mezin ew ne digihîştin vê rojê û ne jî ev asta ewlehî û aramiyê bi dest dixist û got, "Cangorî ew kes in ku bi xwîna xwe hêvî çêkirine û em bi her tiştê ku em hene deyndarê wan in. Ew ê bibin çira û rêber ku rêya me ronî dike; em ê her tim wan bi bîr bînin û soza xwe ya şopandina şopa wan nû bikin û nû dikin."

Peyama YBŞ'ê bi vî rengî dewam kir:

"Her wiha em pîrozbahiyên xwe li Rêber Apo dikin, azadiya wî ya fîzîkî dixwazin û piştrast dikin ku bîrdoziya wî, ku banga azadî, biratiya di navbera gelan de û jiyana demokratîk dike, dê ji bo hemû hêzên berxwedan û azadiyê wekî çavkaniya îlhamê bimîne. Em hêvî dikin ku Cejna Rojiyên Êzî, bi girîngiya xwe ya ruhî û mirovî, peyamên aştî, ewlehî û edaletê hilgire û bandora wê li ser Şingalê û tevahiya Iraqê dirêj bibe. Bila ev cejn gavek be ber bi bidawîkirina êşê, avakirina aramiyê û avakirina pêşerojek ku hemû civak bi hev re di aştiyek mayînde û rêzgirtina hevbeş de bijîn.

Em her wiha hêviya xwe ya kûr diyar dikin ku jinên Êzidî yên hatine revandin û dîlgirtin bi ewlehî vegerin malbatên xwe, ev rûpela tarî ya êşê were girtin û edalet ji bo hemû kesên ku li dijî gelê me sûc kirine were bicîhanîn. Em her wiha hêvî dikin ku hemû kesên koçber bi rûmet û ewle vegerin malên xwe û tiştên ku hêzên tarî wêran kirine ji nû ve werin avakirin û gelê me vegere axa xwe û jiyana xwe ya biawayekî xwezayî ji nû ve bidomîne."

Peyama Fermandariya YBŞ'ê bi vê biryardariyê bi dawî bû:

"Di vê çarçoveyê de, em wek Yekîneyên Berxwedana Şengalê (YBŞ) piştrast dikin ku em ê bi berpirsiyariya xwe ya dîrokî re dilsoz bimînin û em ê bêyî cudakarî parastina gelê xwe û hemû civakên Iraqê bidomînin, wekî ku me berê kiriye. Em ê di erkê xwe yê parastina axê û gelê wê, parastina rûmetê û rûbirûbûna hemû kesên ku hewl didin ewlehî û aramiyê tehdît bikin an jî îradeya gel têk bibin, pêk bînin.

Dubare Cejna Rojiyên Êzî pîroz be."