Êrîşên dewleta Tirk ên li Kurdistanê, li sê navendên Elmanyayê bi çalakiyên girseyî hatin protestokirin.

WÛPPERTAL: Li bajarê Elmanya Wûppetalê, çalakiya ji aliyê Navenda Civaka Demokratîk a Kurd ve hat organîzekirin, bi beşdariya gelek Kurdistaniyan pêk hat. Di çalakiyê de berxwedana li Kurdistanê hat silavkirin û êrîşên Erdogan, AKP û çeteyên Esedûllah ên li hemberî Sûr, Cizîr, Silopiya, Nisêbîn û Kerboranê hatin şermezarkirin. Kurdistaniyên saet di 17:00 de li ber Cîty Kîrche civiyan, dirûşmên "Kurdistan wê li faşîzmê re bibe goristan", "Bijî berxwedana bakur", "Kujer Erdogan" û "Bijî Serok Apo" hatin qîrîn. Hevseroka Navenda Civaka Demokratîk a Wûppertalê Savci Azar li vir daxuyaniyek da û diyar kir ku AKP amadekariyan dike li Bakurê Kurdistanê komkujiyeke mezin bike û got, "Bêdengiya li hemberî van komkujiyan sûcê li dijî mirovahiyê ye. Divê em xwedî li berxwedanê derkevin."

FRANKFÛRT: Li bajarê Elmanya Frankfûrtê, komkujiyên li Kurdistanê ji aliyê dewleta Tirk ve tên kirin, bi mîtîngek li ber Konsolosxaneya Tirk hatin şermezarkirin. Di mîtînga ku saet di 15:00 de destpê kir, bi sedan Kurdistanî û pêkhateyên Yekîtiya Hêzê ya Demokratîk amade bûn. Di axaftinên li mîtîngê de hat ragihandin ku ji ber xweranegirtina li xwerêveberiyên li Kurdistanê AKP'ê li bajarên Kurdistanê derketina derve qedexe kiriye û hat gotin, "Qedexeya derketina derve ji bo me gelê Kurd bêwate ye. Eger li Kurdistanê destaneke mezin a berxwedanê tê nivîsandin, divê me jî li Ewropayê vê berxwedanê li her qadê belav bikin."

ESSEN: Kurdistaniyên li Essenê dijîn li ber Konsolosxaneya Tirk çalakî lidarxistin. Kurdistaniyên ji Essen û Dortmûndê hatin gotin, "Kurdistan ne bi tenê ye. Rûyê kujer ê AKP-Erdogan ê li dijî Kurdan ku heta roja îro vedişart, derketiye holê. Bi rêbazên DAIŞ'ê êrîşî Kurdan dike."

Di çalakiyê de bi qîrîna dirûşmên "Kujer TC", "Kujer Erdogan" dewleta Tirk hat şermezarkirin.