Berxwedana xwerêveberiya gelê Cizîrê di roja 40. de ye. Hêzên dewletê yên nikarin bi berxwedana gel, ji bo şêniyên navçeyê ji Cizîrê derxînin, bênavber bi tank û topan êrîşî malên sivîlan dikin. Ji duh bi şev û vir ve top li taxên Cûdî û Nûrê dibarin. Tankên dewleta Tirk ên li ser Girê Caferî Sadik, Çarkendal, Kolana Kobanê û Kolana Arîn Mîrxan bi cih bûne, topan li taxên Cûdî û Sûrê dibarînin. Ji ber topbaranê gelek xaniyan zerar dîtin û dûxan ji taxan bilind dibe.

Li aliyê din, leşkerên Tirk ên li taxên Dagkapi û Alîbeyê lêgerînê li malan dikin, bi zorê gel ji xaniyên wan derdixînin. Leşker û polîsên Tirk, malên xwedî ne lê ne jî bi funye deriyên wan diteqînin û li ber 'mehter marşi' lêgerînê li van deran dikin.

Parlamenterê HDP'ê yê Şirnexê Ferhat Encu yê ku ji roja destpêkirina êrîşan û vir ve li Silopiyayê bû, danê sibehê xwest bikeve nava Cizîra Botan. Lê belê polîs û leşkerên Tirk ên pêşî li Encu û yên pê re birîn, bi ser wan de meşiyan. Her wiha destûr nehat dayîn ku Encu û yên pê re vegerin Silopiyayê. Ji ber astengiyan Encu û mirovên pê re berê xwe dan Şirnexê.