Li Cizîrê, birîndarên ku dema duh ji avahiyê derdiketin rastî êrîşa hêzên dewletê hatin, ev 20 saet in agahî ji wan nayê girtin. 14 personelên tenduristiyê yên dildar ên ji TTB û SES'ê yên dixwazin biçin Cizîrê, li pêşiya Hezexê hatin sekinandin.
Li Cizîrê, birîndarên ku dema duh ji avahiyê derdiketin rastî êrîşa hêzên dewletê hatin, ev 20 saet in agahî ji wan nayê girtin. 14 personelên tenduristiyê yên dildar ên ji TTB û SES'ê yên dixwazin biçin Cizîrê, li pêşiya Hezexê hatin sekinandin.
Li Cizîrê têkoşîna jiyanê ya birîndarên ku di jêrzemîna avahiyekê de asê man e, 9 roj in didome. Duh bi agahiya rayedarên Wezareta Karên Hundir re, birîndar dema ji bo xwe bigihînin ambûlansan ji malê derketin rastî êrîşên hêzên dewletê hatibûn û ji duh êvarê ve di bin topbaranê de ne. Bi birîndaran re ev 20 saet in ti têkilî nehatiye danîn û fikarên der barê jiyana wan de her ku diçe zêdetir dibe.
9 doktor, 4 hemşîrê û ajokarek ambulansê yên endamên TTB û SES'ê jî ji bo xwe bigihînin birîndaran ber bi Cizîrê ve birêketibûn. 14 kedkarên tenduristiyê yên dildar li pêşiya Hezexê hatin rawestandin û rastî kontrola nasnameyan hatin. Hêzên dewletê destûr nadin ku kedkarên tenduristiyê di rêya xwe de biçin.
Her wiha, Walîtiya Şirnexê jî daxuyaniyeke manîpulatîf weşandibû û îddia kiribû ku li gel ambûlans hatine şandin jî birîndar bi xwe ji malê derneketine.
Ev 20 saet in ji 15 birîndar û 9 kesên li gel wan ti agahî nayê girtin. Her wiha, cenazên 7 welatiyên ku ji ber nehatin dermankirin jiyana xwe ji dest dan jî, di jêrzemînê de ne.
