Li Parîsa paytexta Fransayê, bi hezaran kes tev li çalakiyên protestoyî yên li dijî zehmetbûna kirina debara xwe bûn.

Xwepêşanderên bi banga partiyên çepgir û sendîkayan daketin qadan, daxwaza zêdebûna destheqê xwe, bacdarkirina karê û avêtina gavên kêmkirina bandora enflasyonê dikin.

Li Elmanyayê jî zêdebûna bihayê enerjî û dexil û dan hat protestokirin. Komeke bi du sed kesan ku li ber ofîsa Serokwezîr Olaf Scholz hat ba hev, dirûşma “Alîkariya bi lez û bez ji bo xizanan“ berz kir û banga piştgiriya ji bo welatiyên xizan kir.

Li Romaya paytexta Îtalyayê, roja Şemiyê komek ji bo protestokirina bihayê gaz û ceyranê û bi daxwaza birîna ji fatûreyan, zêdekirina destheq û alîkariya civakî, li hev civiya. Xwepêşander Andrea Ilarî got: “Mirov bi rêya fatûreyan hîsa bihabûnê dikin. Bihabûn, ji bo qatên civakî yên xizan pirsgirêkeke cidî ye.“

Bi bandora şer, krîza dexil û dan û enflasyonê, li welatên bipêşketî yên Ewropayê jî metirsiya lihevketina civakî zêde dibe. Pispor hişyariya “serdema turbulansa mezin“ dikin. Aliyên siyasî jî li rêya çareseriyê digerin.