Kamyonek topên hawanê yên li Edeneyê hatin zevtkirin, rastiya ku komên çete ji ku derê çekan bi dest dixin, careke din raxist pêş çavan. Balkêşe ku 935 topên hewanê û 10 lûleyên wan ên li Edeneyê hatin girtin, dişibin lûle û topên hawanê yên YPG'ê di meha Îlonê de ji ser çeteyên DAIŞ/El Nûsra rakirin.

Di 8'ê Mijdara 2013'an de li ser giliyekê di TIR'ek li Edeneyê de 935 topên hawanê û 10 lûleyên avêtinê hatin zevtkirin. 

Balkêşê di meha Îlonê de dema Yekîneyên Parastina Gel (YPG) gundên Elok, Cafa, Dirdarê, Hemîd yên Serêkaniyê ji destê DAIŞ/Cephet El Nusra derxist du lûlên topên hawanê û gelek top desteser kiribûn. 

Çavkaniyên YPG ragihandibûn ev lûle û hawanên desteser kirine ne yê artêşane û ji ber wê ew nikarin bikar bînin. 

Di wêneyan jî tê xuyakirin ku topên hawanan ên li Tirkiyê hatine girtin û yê YPG’ê desteser kirine wek hev in.

Piştî bûyera li Edeneyê, di şeva 8'ê Mijdarê de li Derya Egeyê, di keştiyeke bar a li nêzî peravên Kardakê hat rawestandin de, gelek çek û teqemenî hatibû desteserkirin. Li keştiyê 20 hezar kalaşnîkof hatibû dîtin. Hatibû ragihandin ku kaptan û sê xebatkarên keştiyê, Tirkiyeyî ne. Li gorî kaptan, dê biça Skenderûnê. Medya Rûs îdîa kiribû ku ev keştî pênc rojan li Stenbolê mabû.