Girtiyên siyasî yên Kurd Hebîbûllah Gulperîpûr, Reza Mamedî û Şêrko Maarfî yên ji aliyê rejîma Îranê ve hatin darvekirin, li bajarê Turku yê Fînlandiyayê bi merasîmekê hatin bîranîn.

Partiya Jiyana Azad a Kurdistanê (PJAK) bi armanca bîranîna girtiyên siyasî yên Kurd Hebîbûllah Gullperîpûr, Reza Mamedî û Şêrko Maarfî yên ji aliyê rejîma Îslamî ya Îranê ve hatin darvekirin, li bajarê Turku yê Fînlandiyayê merasîmek lidar xist.

Merasîm li salona çandê ya Turku bi deqeyek rêzgirtin û xwendina sirûda "Ey Reqîp" destpê kir. Yek ji rêveberên PJAK'ê yê Ewropayê Ehwen Chiyako li merasîmê axivî û diyar kir ku rejÎma Îranê berevajî pêkanîna demokrasiyê hewl dide bi siyaseteke nerm tundî û dijwariya xwe ji cîhana derve re veşêre.

Chiyako da xuyakirin ku Îran ji destketiyên gelê Kurd ên li Bakur, Rojava û Başûrê Kurdistanê ditirse û ji xwe ji serhildana gelê li Rojhilatê Kurdistanê vedigire. Chiyako destnîşan kir ku PJAK dê bi pêkanîna azadiyê ji bo gelê Kurd û Kurdistanê, tola şehîdên xwe hilîne.

Endamê KNK'ê mamoste Cafer Karîmî jî li merasîmê peyivî û xwest, her kes xwedî li têkoşîna cangoriyên Kurdistanê derkeve.

Di merasîmê de her wiha hunermend Reşîd Feyzînejad, Seîd, Kemal, Abdullah Hacî, Ruf û Azîz Nehlî helbest û berhemên xwe pêşkêş kirin.