Rêxistinên Kobanê yên  Partiya Yekîtiya Demokratîk (PYD), Partiya Çep a Kurd li Sûriyê, Partiya Demokartîk a Kurd –Sûriyê, Yekîtiya Demokratîk a Kurd li Sûriyê (El-Wehdê) bi daxuyaniyekê hevbeş êrîşî bombeyî a li dijî Navenda Heyva Sor a Kurd a Kobanê şermezar kirin.

Di daxuyaniyê de hat bibîrxistin ku li Rojavayê Kurdistanê gelek destketiyên siyasî bi destxistine, hêzên YPG'ê bi gelê herêmê re bûne yek û herêmên Rojava ji komên çete rizgarkirine û hat gotin, "gelê herêmê bi hemû pêkhate û olên xwe ve hewl didin sîstemeke demokratîk pêşbixin  û dest bi avakirina rêveberiya demî kirine."

Di berdewama daxuyaniyê de hate destnîşankirin ku di van deman de navenda Heyva Sor a Kurd a Kobanê rastî êrîşa bombeyî ya komên teror hat û di encamê de zarok jî di nav de zêdeyî 10 kesan jiyana xwe ji dest dane û zêdeyî 20 birîndar bûne. Her wiha gelek ziyana madî li derdorê çêbû ye.

Di daxuyaniyê de êrîşa bombeyî ya Kobanê hate şermezarkirin û ev tişt hatin gotin:" Gelê Kurd dê li dijî van êrîşan bi hêztir bibe. Di demên dawî de bi ked û berxwedana hêzên YPG'ê û Asayîşê de herêm bi ewlebû û gelek hewldanên komên teror hatin bê bandorkirin."

Di daxuyaniyê de hate gotin ku rewşa aram û bi ewle ya herêmên Kurdî ne xweşiyan gelek hêzên Navnetewî û herêmî hate û wiha hate domandin:" Hêzên navneteweyî û herêmê ku piştgiriya komên çete dikin, dixwazin doza gelê Kurd bikin mijara bazarê. Em ji van hêzan re dibêjin ku gelê Kurd hişyare û bi YPG'ê û hêzên xwe yên siyasî re bûne yek, êdî hemû plan û lîstokên li dijî Rojava dê vala bêne derxistin. "

Di daxuyaniyê de bang li hêzên Asayîşê hate kirin ku lêpirsînê û lêkolînê bide destpêkirin. Di dawiya daxiyaniyê de soz bi şehîdan re hate dayîn dê rêya wan a azadiyê bê şopandin.