Bijîşkên ku li Libnanê birîndarên êrîşên Îsraîlê derman dikin, bang li civaka navneteweyî kirin ku bikeve nava tevgerê. Kedkarên tenduristiyê bal kişandin ser wekheviyên di navbera êrîşên li Xezayê û rewşa heyî ya li Libnanê de.

Cerrahê Brîtanî Dr. Tom Potokar, di daxuyaniya xwe ya ji bo Sky Newsê de got, “Binpêkirinên hiqûqa mirovî ya navneteweyî asayî bûn” û diyar kir ku nexweşxane û tîmên tenduristiyê tên hedefgirtin.

Bijîşkan anîn ziman ku lîderên siyasî tenê peyamên şermezarkirinê diweşînin, lê ji bo rawestandina binpêkirinan tu gavên berbiçav nayên avêtin. Hate destnîşankirin ku divê saziyên tenduristiyê qadên ewle bin.

Li gorî Wezareta Tenduristiyê ya Libnanê, di êrîşên hefteyên dawî yên Îsraîlê de li başûr herî kêm 128 saziyên tenduristiyê û ambûlans hatine hedefgirtin; 42 kedkarên tenduristiyê hatin qetilkirin, 107 kes jî birîndar bûn.

Hate ragihandin ku ji 2’yê Adarê û vir ve di êrîşan de herî kêm 1116 kes mirine û 3229 kes jî birîndar bûne.

Kedkarên tenduristiyê dan xuyakirin ku hin êrîş bi taktîka lêdana dualî têne kirin; ango piştî êrîşa yekem, tîmên ku digihîjin herêmê bi êrîşa duyem tên hedefgirtin.

Rêxistina Efûyê ya Navneteweyî diyar kir ku kedkarên tenduristiyê di çarçoveya hiqûqa navneteweyî de wekî sivîl tên qebûlkirin û hedefgirtina wan a bi zanebûn dikare wekî sûcê şer were hesibandin.