Alîkarî Serokatiya Dewletên Yekbûyî yên Emerîkayê (DYE) JD Vance diyar kir ku di hevdîtinên navbera Washington û Tehranê de pêşketinên girîng hene û ragihand ku her du alî ji bo lihevkirineke muhtemel muzakereyan didomînin.
JD Vance daxuyanî da rojnamevanan û diyar kir ku li ser hin xalên metna peymanê xebat tê meşandin. JD Vance got, “Me pêşketineke mezin bi dest xist. Em hêvî dikin ku ev pêşketin dewam bike. Lê belê hîna zelal nebûye ka gelo Serok Donald Trump wê peymanê erê bike yan na.”
Li gorî nûçeya çapemeniya DYE’yê, Washington û Tehran ji bo bidawîkirina şerê li Rojhilata Navîn, nêz bûne ku li ser peymaneke çarçoveyê li hev bikin. Lê belê çavkaniyan diyar kir ku peyman hîna ji aliyê Trump ve nehatiye erêkirin.
Li gorî agahiyên Axios, di peymanê de şertê ku Îran çeka nukleer bi dest nexe, heye. Li beramber vê yekê tê pêşbînîkirin ku hin pêkanînên DYE’yê yên li ser îxracata petrolê ya ji bo Îranê, bên rawestandin û dorpêça li ser lîmanên Îranê were rakirin.
HURMUZ Û PÊKANÎN
Di metna peymanê de tê plankirin ku derbasbûnên li Kendava Hurmuzê li ser esasê “xwegihandina bêsînor” bên domandin. Lê belê Wezîrê Xezîneyê yê DYE’yê Scott Bessent diyar kir ku ew ê nehêlin li herêmê “sîstemeke pere ya ji bo derbasbûnê” were avakirin.
Li aliyê din Washington, ji bo bi sînorkirina pereyên ku Îranê ji firotina petrolê bi dest xistine, pêkanînên nû ferz kir.
NUKLEER Û MALDARIYÊN HATINE RAWESTANDIN
Rêveberiya Tehranê dixwaze maldariya wan a nêzî 24 milyar dolarî ya hatî rawestandin, bikeve meriyetê. Îran qebûl nake ku stokên uranyumê yên hatine dewlemendkirin, bên şandina derveyî welêt. Serokê DYE’yê Donald Trump jî dixwaze ev stok bi temamî bên îmhakirin.
