Komîteya Parastina Rojnamevanan (CPJ), xwest ku rojnamevan Ahmed Şihab-Eldin ê ku li Kuweytê hatibû binçavkirin, were berdan. Saziyê diyar kir ku sûcdariyên li dijî wî, ji bo bêdengkirina rojnamevanên serbixwe tên bikaranîn.
Komîteya Parastina Rojnamevanan (CPJ), îro di daxuyaniya xwe de bang li Kuweytê kir ku rojnamevanê navneteweyî Ahmed Şihab-Eldin tavilê were berdan.
Rojnamevanê Amerîkî yê bi eslê xwe Kuweytî Şihab-Eldin, di 3yê Adarê de dema ku ji bo serdaneke kurt li welêt bû, hatibû binçavkirin.
Di daxuyaniya CPJê de hat diyarkirin ku rayedaran Şihab-Eldin bi hincetên wekî "belavkirina agahiyên nerast, zirardana li ewlehiya neteweyî û xirab bikaranîna telefona mobîl" tawanbar dikin. CPJ’ê destnîşan kir ku ev sûcdarî hincetên nediyar û zêde berfireh in ku pir caran ji bo bêdengkirina rojnamevanên serbixwe tên bikaranîn.
Şihab-Eldin, dîmenên têkildarî ketina balafireke hêzên hewayî ya DYA’yê li herêma El Jahra ya li rojavayê Kuweytê weşandibûn.
CPJ’ê bal kişand ser wê yekê ku binçavkirina Şihab-Eldin di demeke wiha de pêk hat ku di pêvajoya şerê DYA û Îsraîlê yê li dijî Îranê de, li welatên Kendavê sansura li ser çapemeniyê her ku diçe tundtir dibe.
