Di êrîşa balafirên bêmirov (AHB) ya Îsraîlê de ku li Başûrê Libnanê pêk anî, sê rojnamegeran jiyana xwe ji dest dan. Karbidestên Libnanî û kanalên televîzyonê piştrast kirin ku maşîneya rojnamegeran bi gelek mûşekan hatiye hedefgirtin.

Di êrîşê de hat ragihandin ku nûçegihanê Al-Manar TV yê nêzî Hizbullahê Ali Shoeib, nûçegihana kanala Al-Mayadeen Fatima Ftouni û birayê wê yê kameraman Muhammed Ftouni jiyana xwe ji dest dane. Ev bûyer ji aliyê saziyên medyayê yên têkildar û artêşa Libnanê ve hat piştrastkirin.

Hat diyarkirin ku Ali Shoeib ê ku bi salan e li qadê erkdar e, nûçegihanekî şer ê naskirî ye û nêzî 30 sal in ji bo Al-Manarê dixebitî.

Artêşa Îsraîlê di daxuyaniya xwe de angaşt kir ku wan bi hinceta têkiliya wî ya bi yekîneya "Radwan" a Hizbullahê re Ali Shoeib hedef girtiye. Di daxuyaniyê de têkiliya rojnameger a bi endamên Hizbullahê re û xebatên wî yên li qadê wekî hincet hatin nîşandan, lê derbarê du rojnamegerên din ên ku di heman êrîşê de jiyana xwe ji dest dane de tu nirxandin nehat kirin.

Hat ragihandin ku Fatima Ftouni di van demên dawî de li eniyên pêş ên şerê Îsraîl-Hizbullahê nûçe çêdikirin û malbata wê jî beriya çend hefteyan di êrîşan de hatibûn qetilkirin. Hat zanîn ku Ftouni nêzî 18 meh berê jî ji êrîşekê sax filitîbû, lê di wê êrîşê de du hevkarên xwe winda kiribûn.

Hat destnîşankirin ku her sê rojnameger, li herêma Cizzîn a Başûrê Libnanê ku ji xeta eniyê dûr e, dema di rê de bûn hatine hedefgirtin.

Li gorî hiqûqa navneteweyî, rojnameger di statuya sivîl de ne û hedefgirtina wan wekî sûcê şer tê qebûlkirin.

Serokkomarê Libnanê Joseph Aoun, di daxuyaniya xwe ya derbarê êrîşê de diyar kir ku hedefgirtina rojnamegeran binpêkirina hiqûqa navneteweyî û qaîdeyên bingehîn ên hiqûqa şer e û êrîş şermezar kir.