Endama Meclisa Federal ya Almanyayê Ulla Jelpke aşkera kir ku, ew tam piştgiriyê dide çalakiya Şaredara Nisêbînê Ayşe Gokhan ku li dijî dîwarê di navbera Nisêbîn-Qamişlo de ava dikin, dest bi çalakiya rojiya mirinê kiriye. Jelpke ya Partiya Çep bibîrxist ku, wê gelek caran sinorê mijara gotinê derbaz kiriye û peyama “Hevgirtin sinoran nasnake” da.

Şaredara Nisêbînê Ayşe Gokhan ku li dijî dîwarê dewleta Tirk  dixwaze di navbera Bakûr û Rojavayê Kurdistanê de ava bike dest bi çalakiya rojiya mirinê kiriye, di roja 9’mîn de peyamên piştgiriyê didomin. Parlementera Alman Ulla Jelpke daxuyaniyek nivîskî weşand û ragihand ku, ew tam piştgiriyê dide çalakiya Gokhanê.

Endama Partiya Çep Jelpke baldikişîne ser ku, dîwarê dixwazin ava bikin hewil didin tevgera azadî û şoreşa gelê Kurd ya li Rojavayê Kurdistanê daye destpêkirin derbazî Bakûrê Kurdistanê nebe. Jelpke got: “Dewleta Tirk pir ditirse ku ruhê şoreşê yê li tenişta wê bilind dibe negehe sinorê wê. Ne tesadufe di demekî ku êrîşên komên terrorist ên girêdayî El Qaîdeyê û piştgiriyê ji Tirkiyeyê distînin êrîşên xwe li Rojava zêdekirine de, dîwar bê avakirin.”

Parlementera Alman anî ziman ku, ew gelek caran çûye Nisêbîn û Qamişloyê, di her du bajaran de jî dostên wê hene û ev bangawazî kir: “Ez Ayşe Gokhanê jî nas dikim, dema ku ez dihatin herêmê hevalbendiya min dikir. Herdu bajarên bisinoran hatine perçekirin di rastiyê de yekin. Di serî de çalakiya Gokhanê û gelê herêmê ku li dijî ‘dîwarê şermê’ çalakî dane destpêkirin ji dil piştgiriya xwe tînim ziman. Hevgirtin sinoran nasnake.”