Navenda Çandê ya Mezopotamyayê (NÇM) û Komeleya Lêkolînên Kurd, 15‘ê Gulanê Cejna Zimanê Kurdî li navçeya Esenyûrt a Stenbolê bi meşekê pîroz kir. Ji xeynî Wekîla HDP’ê ya Stenbolê Zuleyha Gulum bi sedan kes tev li meşê bûn. Gel li avahiya HDP’ê hat ba hev, li erbaneyan xist û govend girt. Di pîrozbahiyê de gelek kesan cil û bergên gelêrî li xwe kiribûn. Bênavber dirûşmeyên ‘’Bijî Serok Apo’’, ‘’Bê ziman jiyan nabe’’ û ‘’Bijî berxwedana zindanan’’ berz kirin. Gel piştî demekê bi pankartê ‘’Bila zimanê Kurdî bibe zimanê fermî û perwerdeyê’’ nivîsandî ber bi qada Esenyûrtê ve meşiya. Dayik bi cil û bergên neteweyî û laçikên xwe yên spî tev li meşê bûn.

'DIVÊ ZIMANÊ KURDÎ BIBE ZIMANÊ FERMÎ Û PERWERDEHIYÊ’

Hevseroka Komeleya Lêkolînên Kurd Remziye Aslan diyar kir ku 15‘ê Gulanê ji xeynî roja cejnê roja gera li mafê xwe ye jî. Alparslan, biryarên Dadgeha Mafê Mirovan a Ewropayê yên li ser zimanê zikmakî bi bîr xist û got ku tevî ku biryar hene, hêzên hegemon zimanê zikmakî yê bi milyonan Kurdan ji xwe re kiriye armanc. Bi domdarî Alparslan wiha got: “Kurd hema bibêje sed sal in ji bo zimanê xwe yê zikmakî têdikoşin. Gelê Kurd bi salan e hewil dide ziman û çanda xwe zindî bihêle. Tekoşîna ziman û nasnameyê ya Celadet û hevalên xwe 15‘ê Gulana 1932‘yan pêşengiya wê kiriye îro jî berdewam e. Divê zimanê Kurdî bibe zimanê fermî û perwerdeyê.“

‘EM Ê ZIMANÊ XWE YÊ QEDÎM ZINDÎ BIHÊLIN’

Hevserokê Komeleya Lêkolînên Kurd Eyup Sûbaşi bi lêv kir ku têkoşîna Kurdan a ji bo zimanê xwe şoreş e û ev tişt gotin: ‘’Ev şoreş ji şoreşên li cîhanê pir pir giringtir e. Ev şoreş, şoreşa ziman û çandê ye. Heta ku statuyek ji zimanê Kurdî re çêbibe, bibe zimanê perwerdeyê, em ê li vê têkoşîna xwe dewam bikin. Em ê vî zimanê qedîm zindî bihêlin. Zimanê me ji dest biçe wê pêşeroja me jî ji dest biçe. Lewma, divê di serî de gelê me, hemû sazî û destgehên me di her warê jiyana xwe de bi kar biînin.’’

'ÎNGILIZÎ Û GELEK ZIMANÊN DIN SERBEST IN LÊ KURDÎ QEDEXE YE’

Hevserokê HDP’ê yê Stenbolê Ferhat Encu jî îşaret bi polîtîkayên bişaftinê kir û wiha axivî: ‘’Rexmê hemû qedexe û astengiyan vî gelî dest ji parastina zimanê xwe berneda. Îro desthilatdarî zimanê 30 milyon Kurdan qedexe dike, lê Îngilizî û gelek zimanên din serbest dihêle. Vê ji ber dijminatiya bi Kurdan re dike. Ev gel bi zimanê xwe dihê naskirin. Ez li vir bang a li gelê me dikim; em xwedîtiyê li zimanê xwe bikin. Zimanê me hebûna me û nasnameya me ye.’’