Girtiyê nexweş Tûrgay Denîz (39) ku li Girtîgeha Metrîsê dihat girtin, vê sibehê li Nexweşxaneya Yedikuleyê jiyana xwe ji dest da. Malbata Denîz a ji navçeya Motkan a Bedlîsê cenazeyê Denîz ji nexweşxaneyê girt û bir navçeya Sûltanbeylî ya Stenbolê. Polisan di rê de çend caran pêşî li malbata Denîz girt û ji wan re astengiyan derxist. Rexmî hemû astengiyan jî malbatê cenazeyê Deniz bir Mizgefta Abdurrahman a li navçeyê û piştî lêzimiyên dînî li Goristana Osmangaziyê bi awayekî girseyî veşart.
 
Hevserokê HDP'a Stenbolê Ferhat Encû, endam û rêveberên HDP'a Sultanbeyliyê û gelek welatî beşdarî merasîma cenaze bûn. 
 
Piştî ku cenaze hate veşartin malbat û kesên beşdarî merasîma cenaze bûn ji goristanê derketin û çûn sersaxiyên xwe bidin malbetê. Malbat şîna xwe li Komeleya Alîkarî û Piştevaniya Gel a Bedlîsê ya li taxa Kavakpinarê ya navçeya Pendîkê danî. 
 
Her wiha diyar bû, birayê Denîz ê bi navê Ûlaş Denîz jî li Girtîgeha Kandirayê girtî ye û xwestiye ku tevlî merasîma cenazeyê kekê xwe bibe lê tevlîbûna wî ji aliyê rêveberiya girtîgehê ve hatiye redkirin.