Li Dîlokê di encama êrîşên faşîstan ên li hemberî çalakiyên li dijî êrîşên çeteyên DAIŞ'ê yên li hemberî Kobanê welatiyê bi navê Musa Bayram bi giranî birîndar bû û li nexweşxaneya lê dihat dermankirin jiyana xwe ji dest da. Bi tevî Bayram hejmara kesên ku di bûyeran de jiyana xwe ji dest dan derket 5 kesan.

Wek gelek bajaran li Dîlokê jî çalakiyên şermezarkirina êrîşên çeteyên DAIŞ'ê yên li hemberî Kobanê hate lidarxistin. Polîs û komên faşîst êrîşî çalakvanan kir û di encama êrîşan de 4 welatiyan jiyana xwe ji dest dan. Her wiha di wan bûyeran de welatiyê bi navê Musa Bayram jî bi guleya keleşê ji serê xwe bi giranî birîndar bû. Bayram ê ku li Nexweşxaneya Deva ya Taybet a Dîlokê dihat dermankirin jiyana xwe ji dest da û hejmara kesên ku jiyana xwe ji dest dane derket 5 kesan. Rewşa her sê birîndarên din ên ku di encama êrîşên polîs û faşîstan de birîndar bibûn xetere û talûkeya jiyanî didome.

Hate hînbûn ku dê cenazeyê Bayram ji bo definkirinê wê bibin navçeya Qilebana Şirnexê û li wir defin bikin.