Fermandariya Biryargeha Navenda Parastina Gel (NPG) diyar kir, ku dewleta Tirk li Cizîr, Nisêbîn, Sûr û Silopiyayê û heta li gelek navendan şer li hember welatiyên sivîl daye destpêkirin, zarokan, kal û pîr, dayik û bavan qetil dikin û bi derewan dibêjin 'Me PKK'yî kuştine'. NPG'ê ev pirs kir: "Eger hêzên ewlekariyê yên dewleta AKP'ê 711 kuştin, cenaze li ku ne?"

Fermandariya Biryargeha Navenda Parastina Gel da xuyakirin ku dewleta AKP’ê di 24’ê Tîrmeha 2015’an de li hember Kurdan şerekî topyekûn da destpêkirin û ji 16’ê Tebaxê û şûn ve jî her tim bi awayekî cuda li kolanên bajaran di bin navê qedexeya derketina derve de li hemberî gelê Kurd dest bi pêkanîna qetlîaman kiriye. Fermandayê ragihand ku li kolan û bajaran gelê Kurd û ciwanên welatparêz bi awayekî xurt bersivê didin êrîşan û li ber xwe didin. Fermandariya Biryargehê diyar kir ku di vê rewşa şer de ji her du aliyan jî kuştî û birîndar çêdibin û her du alî bi daxuyaniyan bîlançoyê aşkere dikin.

'KUŞTINA 711 PKK'YIYAN' ASTA HERÎ BILIND A DEREWÊN HETA NIHA YE

Daxuyaniyê bi vî rengî dewam kir:

"Lê belê Serokatiya Fermandariya Giştî ya Tirk, her roj daxuyaniyan dide, kuştiyên xwe vedişêre, sivîlên li nava bajaran qetil dike weke PKK'yî dihesibîne, vê hejmarê dinepixîne û bi vî rengî şerekî psîkolojîk dimeşîne. Di daxuyaniya herî dawî ya 23'ê Çileyê de hat gotin 'li her sê bajaran bi giştî 711 PKK'yî hatine kuştin'. Ev bûye asta herî bilind a derewên heta niha kirine.

Beriya her tiştî hêza çekdar a PKK û HPG'ê li nava bajaran wezîfedarkirî nînin. Lewma ew kesên di daxuyaniyan de weke PKK'yî ne gerîlayên HPG'ê ne, dibe ku sivîlên tax û kolanên xwe diparêzin bin. Dewleta Tirk li Cizîr, Nisêbîn, Sûr û Silopiyayê û heta li gelek navendan şer li hember welatiyên sivîl daye destpêkirin, zarokan, kal û pîr, dayik û bavan qetil dike û nûçeyên derewan dibêje 'Me PKK'yî kuştin'.

EGER WE 711 KES KUŞTIBIN, CENAZEYÊN VAN MIROVAN LI KU NE?

Eger hejmara mirovên sivîl ên hatine qetilkirin were jimartin jî, hejmara mirovên sivîl ên di vê demê de hatine qetilkirin nagihêje 711 kesan. Daxuyaniyên hin rêxistinên civakî yên sivîl ên di nava vê demê de hatine dayîn, referanseke girîng e. Li gorî daxuyaniya dawî di vê demê de 65 jê zarok bi igştî 259 mirovên me yên sivîl ji aliyê hêzên dewleta AKP'ê ya faşîst ve şehîd hatine xistin. Yanî hejmara sivîlên di nava vê pêvajoya şer de hatine qetilkirin, kêmî 711 kesan e. Eger li gorî îdîayên wan hêzên ewlekariya dewleta AKP'ê 711 kes qetil kiribin, wê çaxê cenazeyên van mirovan li ku ne! Çima ji raya giştî vedişêrin!

Weke encam; AKP a mêtînger di bin navê 'Şer li dijî PKK’ê' de li Kurdistanê li dijî welatiyên sivîl şerekî qirêj daye destpêkirin. Welatiyên sivîl qetil dike û rastiyan ji raya giştî vedişêre. Raya giştî ya cîhanê  û Tirkiye girîng e bi van nûçeyên derew nexapin"