Li navçeya Colemêrg Geverê, ku "qedexeya derketina derve" lê hatiye ragihandin, Nexweşxaneya Dewletê veguheriye biryargeha leşkerî. Nexweşên hînê tedawiya wan neqediya bûn jî, berî du rojan bi lez û bez ji nexweşxaneyê hatin derxistin. Li derdor û hewşa nexweşxaneyê maşînên zirxî yên bi tîpa kîrpî û kobra hatine bicihkirin. Her wiha ji Wan, Agirî, Bedlîs û Çewikê gelek ambûlans, ekîbên servîsa lezgîn û ekîbên parastina sivîl sewqî vê derê hatin kirin.

GEF LI XEBATKARÊN NEXWEŞXANEYÊ TÊ XWARIN

Dewleta Tirk ku yekane nexweşxaneya cemaweriyê ya li navçeyê kiriye cebilxane, ji GATA'yê 4 doktorên pispor û ji bajarên cuda çend doktorên pispor aniye. Yekîneyên leşkerî yên bi çekan li nava nexweşxaneyê digerin, gefê li xebatkarên nexweşxaneyê dixwin.

Hêzên dewletê gelek çek û cebilxane anîn nexweşxaneyê û li vê derê depoyek ji cebilxaneyan çêkirin.