Cangoriyên Komkujiya Zîlanê yên di sala 1930'an de ji aliyê dewleta Tirk ve hatin qetilkirin li Ada Xeybeyê hatin bîranîn

Li navçeya Erdîş a Wanê, 15 hezar cangoriyên Komkujiya Zîlanê li Taxa Hasanabdal li Ada Xeybê bi pêşengiya KURDÎ-DER hatin bîranin. Parlamenterê HDP'ê ya Wanê Lezgîn Botan, rêvebirên HDP, DBP, KJA û KCD'ê, Hevşaredarê Erdîşê Abdurrahman Çağan û gelek welatî tevlî bîranînê bûn. Bi sedan kes li ber gora komî pankarta "Em kujerên Zilanê, Roboskî, Dêrsimê, Helepçê, Şengalê û Sînemaya Amûdê lanet dikin" hilgirtin.

Hevserokê KURDÎ-DER'a Erdîşê Şakîr Asil anî ziman ku polîtîkayên îmha û înkarê yên 85 sal berê hê jî berdewam dikin û her roj komkujiyek nû tê jiyin. Asil axaftina xwe wiha berdewam kir: "Niha li Zîlanê pîr û kalên me bê gor radizên. Tenê ji ber ziman û nasnava xwe hatin qetilkirin. Em dixwazin yekser ev komkujî werin ronîkirin û car din komkujî neyên jiyin."

'FERASETA KOMKUJIYÊ NEGUHERÎ'

Parlamenterê HDP'ê Lezgîn Botan jî anî ziman ku bi Komkujiya Zîlanê re mirovahî jî miriye û wiha pêde çû: "Neviyên ew kesên ku bi salan berê Kurd qetil kirin îro kevneşopiya komkujiya Kurdan berdewam dikin. Tenê navê feraseta 85 sal berê guherî."

Piştî axaftinan girse qurnefîlan danî geliyê Zîlanê.