Li paytexta Fransa Parîsê ji bo ji damezirînerên PKK’ê Sakîne Cansiz, Nûnera Parîsê ya KNK’ê Fîdan Dogan û endama Tevgera Ciwanan Leyla Şaylamez ên 9’ê Çileya 2013’an li Parîsê hatin qetilkirin, wê sibehê meşek girseyî bê lidarxistin. KCD-E bi daxuyaniyekê ve banga tevlîbûnê li Kurdistaniyên li Ewropa û dostên wan kir.

Di 3’yemîn salvegera qetilkirina ji damezirînerên PKK’ê Sakîne Cansiz, Nûnera Parîsê ya KNK’ê Fîdan Dogan û endama Tevgera Ciwanan Leyla Şaylamez de aktîvîteyên bîranînê tên lidarxistin. Aktîvîteya bîranînê ya ev hefteyek e li Parîsê didome sibehê bi meşeke girseyî ve wê bi dawî dibe. Kurd sibehê saet 10.00’an li Gare du Nord wê kom bibin, ji vir heta Qada Bastîlle wê bimeşin.

KCD-E ku rêxistina ban a sazî û rêxistinên Kurd ên Ewropa ye, bi daxuyaniyekê ve banga tevlîbûna meşa li Parîsê li Kurdistaniyên li Ewropa û dostên wan kir. 

KCD-E di daxuyaniyê de wiha got: “Ji bo xwedîderketina berxwedana jinên Kurd û ciwanên Kurd ên li hember faşîzma AKP’ê serî natewînin, ji bo xwîna jinên Kurd ên hatine qetilkirin lê erdê nehêlin, ji bo ji qatilên hevalên me Sara, Rojbîn û Ronahî yên li Parîsê bi hovîtî hatin qetilkirin hesab bipirsin, em bang li gelê Kurdistanê yên li Ewropa û dostên wan dikin ku azadiya Rêber Apo bi awayeke xurt qîr bikin, bi tevlîbûna meş û mîtînga mezin a 9’ê Çileyê (sibehê) li Parîsê ve hesabê hevalên me Sara, Rojbîn, Ronahî, Sêvê, Pakîze û Fatma bipirsin.”