Li bajarê Awûstûrya Lînzê bi tevlîbûna Hevserokê KONGRA GEL Remzî Kartal re civîneke gel hat lidarxistin. Kartal têkildarî operasyonên dawî yên dewletê yên li Kurdistanê got, "Dewletê hilweşand, şewitand û tine kir. Lê ji aliyê siyasî ve li Kurdistanê têk çû."

Civîna gel a li salona Volkhaus Neue Heimat a li bajarê Lînzê bi deqeyeke rêzgirtinê ji bo bîranîna şehîdên Kurdistanê û şoreşa cîhanê destpê kir.

Kartal rewşa dawî ya li Kurdistanê nirxand û destnîşan kir, ku dewletê bi xerakirina pêvajoya aştiyê û destpêkirina şer re nîşan da çiqasî ji nirxên PKK'ê ditirse.

Kartal diyar kir, xendekên hêzên berxwedanê yên Kurd, li dijî şerê topyekûn nîşaneya berxwedana topyekûn e û anî ziman, ku rastiya şer bi zanebûn ji civakê re nerast tê ragihandin.

Kartal da xuyakirin, ku tîmên taybet, JÎTEM û leşkerên dewleta Tirk bi zanebûn li Cizîr û Sûrê li nava kolanan sivîlan qetil dikin û destnîşan kir, ku ev pêvajo pêvajoyeke fînalê ya dîrokî ye.

Kartal ragihand, divê hemû Kurdên li Ewropayê dijîn, bi qasî ji dest tê alîkariyê bidin vê pêvajoyê.