Girtiyên PKK'yî di hevdîtina roja Înê ya bi malbatên xwe re ragihandin, ku îdareyê êrîşî wan kiriye.

Li gorî vê yekê; li Girtîgeha Şakranê ku li odeyên ji bo 8 kesan 13-14 kes tên ragirtin, Midûrê Girtîgehê Necmî Azîzoglû bi bahaneya 'wê sewq bê kirin' ji girtiyên PKK'yî xwestiye odeyekê vala bikin û li odeyên ji bo 8 kesan, 17-18 kes bimînin.

Girtiyên ku ev qebûl nekirin, sibeha 4'ê Adarê rastî êrîşê hatin. Tîmên taybet ên ji wan re Robokop dibêjin, ketin hundirê odeyê û bi zorê PKK'yî derxistin.

Girtiyan dan xuyakirin ku Midûr Necmî Azîzoglû ev demeke li dû provokasyonan e û hewl dide mafên girtiyan ji wan bigire.

Girtiyan destnîşan kirin ku ew ê li hemberî êrîşên faşîst li ber xwe bidin û hişyarî dan, ku di her kêliyê de dibe ku tiştên xerab biqewimin, lê ew ê ti carî serî netewînin.

Girtiyan diyar kirin, ji bûyerên qewimîne û biqewimin midûr Necmî Azîzoglû berpirsyar e.