Bi armanca şermezarkirina komkujiyên dewleta Tirk li Kurdistanê dike, li gelek bajarên Elmanyayê çalakî hatin lidarxistin.

HANNOVER: Bi pêşengiya Meclîsa Jinê ya Ronahî li Hannoverê, Kurdistaniyan li ber HBF kon vedan û terora AKP'ê û bêdengiya Ewropayê şermezar kirin. Çalakgeran tevî hewa sar û berfê jî du saet û nîvan çalakiya xwe dewam kirin û dirûşmên "Terorîst Erdogan", "Kujerê zarokan Erdogan" qîriyan. Çalakiyên protestoyî wê îro jî bidomin. Komîteya Amadekar da xuyakirin ku wê îro saet di 16:00 de çalakiyeke girseyî bê lidarxistin û banga tevlîbûnê kir.

DARMSTADT: Endamên Ciwanên Azad li ber HBF a Darmstadtê çalakiya rûniştinê pêk anîn. Di çalakiyê de dirûşmên "Duh Hîtler, îro Erdogan", "TC a dagirker ji Kurdistanê bicehime", "Kujerê zarokan Erdogan", "Fînansman Ewropa, kujer Tirkiye" hatin qîrîn.

KEHL/MULLHEÎM: Li bajarên Kehl û Mullheîm ên Elmanyayê, Kurdistanî ji bo balê bikişînin ser komkujiyên li Kurdistanê dest bi greva birçîbûnê kirin. Grevên birçîbûnê li Navenad Çanda Elewiyan a Kehl û Navenda Çanda Elewiyan a Mullheîmê bi awayekî bêdawî-dorveger tê lidarxistin. Çalakgeran bang li her kesî kirin ku li hemberî komkujiyên barbar ên AKP'ê, bêdeng nemînin.

OSNABRUCK: Li Osnabruckê dosya pêşkêşî sazî û partiyên Elman hat kirin û bal hat kişandin ser terora dewleta Tirk a li Kurdistanê dimeşîne. Endamên Navenda Civaka Demokratîk a Kurd û dostên Elman, gelek partiyên Elman ên li bajêr, Şaredarê Osnabruckê û rêxistinên civakî yên sivîl ziyaret kirin, dosya pêşkêş kirin.

MUNCHEN: Bi pêşengiya Meclîsa Civaka Kurd a Munchenê, li ber avahiya Şaredariyê ya Marîenplatzê mîtîngek hat lidarxistin û komkujiyên dewleta Tirk hatin şermezarkirin. Piştî deqeyeke rêzgirtinê nûnerê NAV-DEM'ê li vir axivî. Endamê Meclîsa Şaredariya Munchenê Çetîn Oraner jî axivî û Komuna Jinê ya Sara belavoka TJK-E xwend. Di çalakiyê de banga tevlîbûna li çalakiya 9'ê Çileyê ya li Parîsê hat kirin.