Hevjîna Ebûbekîr Denîz Dîwan Denîz da xuyakirin, li Silopiya her du siyasetmedar lê hatin windakirin îro mirov li nava kolanên wê tên qetilkirin û destnîşan kir ku gelê Kurd wê têk neçe, wê têkoşînê qezenc bike. Bavê Serdar Taniş Şûayîp Taniş jî ragihand ku kiryar diyar in û ew ê hesab ji wan bipirsin.

Piştî gefa Fermandarê Alaya Jendermeyan a Şirnexê Tûggeneral ê teqawît Levent Ersoz, Fermandariya Jendermeyan a Navçeya Silopiyayê ji bo îfadeyê. bang li Serokê HADEP'ê yê Silopiyayê Serdar Taniş û rêveberê navçeyê Ebûbekîr Denîz kirin. Taniş û Denîz, di 25'ê Çileya 2001'ê de çûn fermandariya jendermeyan û ji hingî ve ev 15 sal in agahî ji wan nayê girtin. Her du siyasetmedar îsal jî ji aliyê hevrê û malbatên xwe ve hatin bîranîn. Der barê aqûbeta wan de ti agahî nîne. Hevjîna Ebûbekî Denîz Dîwan Denîz bibîr xist, ku li Silopiya ya hevjînê wê û hevalê hevjînê wê hatin windakirin, niha jî mirov li naverastê tên qetilkirin.

GELÊ KURD WÊ TÊK NEÇE, WÊ TÊBIKOŞE

Dîwan Denîz diyar kir, dema hevjînê wê hat windakirin kurê wan 9 mehî bû, niha mezin bûye û li gora bavê xwe dipirse.  Denîz anî ziman ku ew nizane çi bersivê bide kurê xwe û diyar kir, wan texmîn dikir cenazeyê hevjînê wê li gora komî ya li Kerboranê be û ji bo vekirina vê derê wan 7 salan têkoşîn meşandine. Denîz da zanîn, ku di encama testa DNA ya li ser hestiyên ji wê derê hatin derxistin de, aşkere bû ku yên hevjîn û hevalê wî nîne û anî ziman, ku ji bo dîtina hestiyên hevjînê xwe ew ê têkoşîna xwe bidomînin. Denîz dest nîşan kir ku ji hingî ve komkujiyên li hemberî gelê Kurd neqediyan e û got, "Tevî her tiştên tên kirin jî gelê Kurd wê ti carî têk neçe û bi têkoşînê re qezenç bike. Her çiqas bi tank û topan me bikujin jî ev gel wê qezenç bike."

NIHA LI NAVERASTÊ MIROV TÊN QETILKIRIN

Denîz ragihand ku li Silopiya ya Taniş û Denîz lê hatin windakirin, niha mirov bi tank û topan li naverastê tên qetilkirin û diyar kir, ku mirovên tên qetilkirin jî weke 'terorîst' tên îlankirin. Denîz da xuyakirin, ku ew ê li dijî vê zilmê her tim dakevin qadan û ti carî ji têkoşîna xwe venegerin.

KIRYAR DIYAR IN, WÊ HESAB WERE PIRSÎN

Bavê Serdar Taniş Şûayîp Taniş jî da zanîn, ku mîna kurê wî û hevalê kurê wî bi sedan mirov hatine windakirin. Taniş diyar kir ku zilm û zordariya li gelê Kurd tê kirin ti carî kêm nebûye û anî ziman, ku kujerên Taniş û Denîz diyar in, weke gel ew ê hesab bipirsin.