Êrîşên qirkirinê yên dewleta Tirk ên li ser îlanên xwerêveberiya gel wê li pêşiya NY bi çalakiya rûniştinê ya 3 rojan bê protestokirin, her wiha daxwaz wê bê kirin ku NY bikeve tevgerê.

Ji bo protestokirina polîtîkayên qirkirinê yên ku di pêşengiya AKP’e û Serokkomarê Tirk Erdogan de li ser îlanên xwerêveberiyên li Bakurê Kurdistanê pêş dikevin û ji ber bûyerên li Kurdistanê ji bo Neteweyên Yekbûyî (NY) bikeve nav liv û tevgerê, li pêşiya avahiya NY a li bajarê Cenevre ya Swîsreyê di navbera 25-27’ê Çileyê de wê çalakiya rûniştinê bê lidarxistin.

Di pêşengiya Navendên Civaka Kurd a Demokratîk a Swîsre (DEM-KURD) de çalakiya rûniştinê wê 25’ê Çileyê roja Duşemê saet 10.00’an li pêşiya avahiya NY destpê bike, 28’ê Çileyê jî wê bi mîtîngekê bi dawî bibe.

DEM-KURD’ê ji bo çalakiya rûniştinê ya li pêşiya NY’yê banga tevlîbûnê kir, bal kişand ser bûyerên di serî de Cizîr û Sûr, ên li tevahî Kurdistanê, hat destnîşankirin ku divê tevahî Kurdistaniyên li Swîsreyê û dostên wan tevlî çalakiyê bibin.

Di daxuyaniya DEM-KURD’ê de hat gotin ku “Me di dema berxwedana Kobanê de çawa bi ruhê çalakiyan ên me li her qadê Ewropa derxist holê û me pê re tevahî cihan rakiribe ser piyan; îro jî divê bi heman şêwazî, em karibin bi çalakiya polîtîkayên qirker ên dewleta Tirk ên li ser Bakurê Kurdistanê vala derxin” û bang li her kesî kir ku 25’ê Çileyê li pêşiya NY bin.