Endamên asayîşa PDK'ê yên sivîl îro li Hewlêrê êrîşî nûçegihanê Rojnewsê Rovan Mihemed Reşîd û kesê ligel nûçeya çalakiya protestokirina girtina Deriyê Sêmalka dişopandin kirin. Di êrîşa bi kevir û daran pêk hatî de nûçegihanê Rojnewsê û ciwanek ji serê xwe bi giranî birîndar bûn.

Ji bo şermezarkirina girtina Deriyê Sêmalka û hebûna leşkerên Tirk ên li Herêma Kurdistanê îro saet derdora 16:45'an de li ber parlamentoya Herêma Kurdistanê ya li Hewlêrê çalakiyek hate lidarxistin. Di çalakiya heya saet 17:30'an berdewam kir de daxuyaniyên protestokirina girtina Deriyê Sêmalka û hebûna leşkerên Tirk a li Başûrê Kurdistanê hatin dayîn. 

Piştî daxuyaniyê, dema ku girse belav dibû, endamên asayîşa PDK'ê yên sivîl nûçegihanê Rojnewsê Rovan Mihemed Reşîd şopandin. Ji cihekî dûr ê  çalakiyê xwestin alavên nûçegihanê Rojnewsê destser bikin. Dema nûçegihanê Rojnewsê li ber xwe da, endamên asayîşa PDK'ê yên sivîl bi kevir û daran êrîş kirin. Di êrîşê de nûçegihanê Rojnewsê Rovan Mihemed Reşîd û ciwanek ji ber derbeyên ji serê xwe xwarin bi giranî birîndar bûn. Nûçegîhan û birîndarên din rakirin nexweşxaneya Hewlêrê.