Keştiyên dewletên Ewropa yên li Derya Spî xebatên rizgarkirinê dimeşînin û keştiyên saziyên alîkariyê, duh 1.128 penabe rizgar kirin. Ji bo destekê bidin yekîneyên ewlekariya peravan ên Îtalyayê, saziyên alîkariyê yên Îngilîz, Îrlanda û Elman jî tevlî operasyonê bûn. Di vê operasyonê de cesedên 17 penaberan ji nava avê hatin derxistin.

Ev penaberên li perava nêzî Sîcîlyayê hatin rizgarkirin, hewl didan bi 5 botên plastîk û 3 keştiyan xwe bigihînin Îtalyayê.

Hejmara penaberên ji roja Sêşeme û vir ve li peravên Îtalyayê hatine rizgarkirin 4 hezar 500 derbas kir. Roja Çarşemê jî cenazeyên 22 penaberan hatin dîtin, ku 21 ji van ên jinan bûn.

Piştî peymana navbera Tirkiye û Yekîtiya Ewropayê, koça penaberiyê li şûna Yewnanîstanê di ser Îtalyayê re dewam kir. Hejmara penaberên ji destpêka vê salê û vir ve xwe gihandine Îtalyayê 80 hezar e. Bi qasî 3 hezar kesî jî jiyana xwe ji dest dan.

Ji sala 2014'an û vir ve hejmara penaberên li Derya Spî jiyana xwe ji dest dan, 10 hezar derbas kir.