Hikûmet li dijî daxwaza girtina sînorên welêt derket. Musteşarê sereke yê Serokwezaretiyê Peter Altmaîer ji rojnameya Berlîner Zeîtûngê re axivî û diyar kir, sînorê Elmanyayê nayên girtin. Altmaîer da xuyakirin, ku ji ber hin êrîşan, nabe ku ew tawîzê ji rêbaza jiyanê ya ‘Ewropî-Rojavayî’ bidin.

Altmaîer da zanîn, ku tedbîrên ewlekariyê yên li welatê wan wê bên zêdekirin û anî ziman, divê xebatên alîkariya ji bo mirovên pêwîstiya wan bi alîkariyê heye, qels nebin.

Altmaîer ku di heman demê de wezîrê ji polîtîkaya penaberan berpirsyar e diyar kir, piştî êrîşên li bajarên Wurzbûrg û Ansbachê, wê tedbîr werin girtin ku ‚ciwanên pirsgirêkên wan hene‘ berê bên tespîtkirin.

BAWERIYA BI MERKEL, BI 12 PÛANAN KÊM BÛ

Piştî êrîşên 18 û 26’ê Tîrmehê yên li bajarên Wurzbûrg û Ansbachê, polîtîkaya penaberiyê ya Serokwezîr Angela Merkel bû hedefa nerazîbûnan. Baweriya bi polîtîkaya Merkel ku par sînor vekir û bi sed hezaran penaber vehewand, di hefteya dawî de gelekî kêm bû.

Ji beşdarên lêkolîna ARD a bi navê Deutschland-Trend bûn, ji sedî 47’ê wan gotin, ew polîtîkayên Merkel napejirînin. Ev rêje nîşan dide ku li gorî meha derbasbûyî 12 pûan kêm kiriye.