Li Elmanyayê, ku ji 18'ê Tîrmehê û vir ve 4 êrîşên cuda lê qewimîn, penaber û biyaniyên din bûne mijara nîqaşên li ser van êrîşan. Hevserokên Dîe Lînke bal kişandin ser xeteriya daxuyaniyên nîjadperestî yên di vî warî de li hemberî penaberan tên kirin û got, "Bûyerên tirsnak ên di rojên dawî de qewimîn, divê nebin sûcdariyeke giştî li hemberî penaber û koçberan."

Hevserokan bibîr xistin, ku gelek penaberên ji Sûriyeyê reviyan e bûne hedfa zilma DAIŞ'ê û destnîşan kirin, ku bi statîstîkan hatiye destnîşankirin, penaberên li Elmanyayê li gorî beşên din ên civakê hîn bêhtir sûc nekirine.

Di daxuyaniyê de hat ragihandin, daxuyaniyên tund û nefretê yên li hemberî penaberan wê welat ewletir neke û hat destnîşankirin, ku bangên dersînorkirinê bi tenê bi kêrî rastgirên tund û terorîstan tên.

Di dewama daxuyaniyê de hat gotin, tundiya Îslamî û nîjadperestî (Elman) her du rûyên madalyonekê ne û ji civakê hat xwestin, ku di vê der barê de hişyar û baldar be.

Hevserokên Dîe Lînke da zanîn, ew li dijî bangên 'bila yekîneyên leşkerî li nava welêt dest bi wezîfeyê bikin' ên piştî êrîşan hatin dayîn in û anîn ziman, tedbîrên zêdetir ên polîsî, wê bi kêr neyên.

Di daxuyaniyê de, ji bo çareserkirina pirsgirêkên li nava civakê, banga çareserkirina pirsgirêka kêmbûna mamoste, şêwirmendên civakî û perwerdekaran, hat kirin.