Hatibû diyarkirin ku çeteyên bi astengkirina operasyonên rizgarkirina Hawîce re mijûl dibûn, herî kêm 2 hezar û 900 sîvîlên ku ber bi Kerkûkê ve direviyan rehîn girtin. Der barê vê daxuyaniya ku Rêxistina Çavdêriya Mafê Mirovan a Iraqê,  li gorî zanînên Neteweyên Yekbûyî daye jî herî kêm 3 hezar sîvîl di destê çeteyên DAÎŞ’ê de ne.

Di daxuyaniya Komîsertiya Bilind a Penaberan a Neteweyên Yekbûyî (UNHCR) de hate diyarkirin ku 3 hezar sîvîlên ku hewl dan ji zilma DAÎŞ’ê birevin hatin girtin. Her wiha ragihand ku ew sîvîl ji Hawîce û gundên derdora wê ne.

Li gor daneyên UNHCR’ê, hejmara sivîlên ku ji ber şerên li Iraqê ji cihê xwe bûne nêzî 3 mîlyon û 400 hezar kesî ne. Li bakurê bajarê Fellûceyê jî bi armanca kesên ku mehên bihurî hatibûn rizgarkirin lê bên bicihkirin, wargehek penaberan a ji bo 21 hezar kesî tê avakirin.

Li gor Neteweyên Yekbûyî, bi destpêkirina operasyona Mûsilê ve jî wê herî kêm nêzî mîlyonek mirovî koçber bibin.