Endamên kampanyaya “Sêşema ji Darvekirinan re Na” di daxuyaniyên xwe de li ser pêla darvekirinê ya zêdebûyî axivîn û destnîşan kirin ku ji destpêka salê ve zêdetirî 177 girtî hatine darvekirin.

Berfirehiya daxuyaniyê bi vî rengî ye:

“Di nav krîza civaka Îranê de, di demekê de ku rejîma Velayet-i Feqîh û amûrên wê yên çewsandin û dadwerî ji destpêka sala 2026’an vir ve zêdetirî 177 girtî darve kirine. Em hîn jî şahidê sepandin û pêkanîna cezayên mirinê yên nemirovane ne. Ev hewldanek bêhêvî ye ji bo tepeserkirina hêrsa gelekî ku ji ber zilm, çewsandin û lêçûna bilind a jiyanê hatiye dorpêçkirin.

Li gorî nûçeyên ku hefteya borî hatine weşandin, bi sedan girtiyên ku bi sûcên giştî hatine mehkûmkirin û gelek caran bêyî agahdarkirinê cezayê darvekirinê li wan hatiye birîn, hatine darvekirin. Gelek girtiyên din jî cezayên wan hatine piştrastkirin. Cezayên darvekirinê yên girtiyên siyasî Elî Fettah û Mihemed Nakîzade ji aliyê Dadgeha Bilind ve hatine piştrastkirin û ew ji bo beşa yekkesî ya Girtîgeha Gezilhessarê hatine veguhestin. Du girtiyên siyasî yên din, Elî Kemalî û Peyman Gencî, jî ji Girtîgeha Mezin a Tehranê bo Gezilhessarê hatine veguhestin. Peyman Gencî yê 23 salî, di xwepêşandanên Kanûna 2025’an de hatiye girtin û ji aliyê şaxa 26’emîn a Dadgeha Şoreşê ya Tehranê ve cezayê darvekirinê lê hatiye birîn.

Her wekî ku me gelek caran berê jî diyar kiriye, Zindana Gezilhessar navenda sereke ya darvekirinê li parêzgeha Tehranê ye û yek ji cihên darvekirinê yên rejîmê ye. Gelek girtiyên ku cezayê darvekirinê li wan hatiye birîn tê de ne û kesên ku ji bo vê girtîgehê têne veguhestin, bi xetereya darvekirinê re rû bi rû ne.

Rêxistina Efûyê ya Navneteweyî daxwaza rawestandina darvekirina girtiyên siyasî û jiyana pênc girtiyan (Elîreza Merdasî, Mesûd Camî, Reza Abdalî, Ferşad Etemadî-Fer, û Hesen Mosallawî) li Îranê kir. Wekî endamên Kampanyaya “Sêşema ji Darvekirinan re Na”, em daxwaza rawestandina tavilê ya darvekirinan dikin û bang li hemû kesên xwedî wîjdan, çalakvanên siyasî, mafên mirovan, sivîl û sendîkayan dikin ku bi her awayî darvekirinan şermezar bikin û gavên cidî bavêjin da ku wan rawestînin. Azadî, wekhevî û parastina rûmeta mirovan bêyî garantîkirina mafê jiyanê ne mimkûn e. Em bang li hemû dijberên cezayê mirinê dikin ku hevgirtinê nîşan bidin û çalakiyên hevbeş bikin da ku avahiya otorîter û çerxa ku jiyana mirovan xirab dike bişkînin.”