DBP’ê diyar kir ku ev bûyer ne bûyereke takekesî ye û daxwaz kir ku hemû polîsên ku di êrîşê de cih girtine ji kar werin avêtin û berpirsiyar bên darizandin. Di daxuyaniya DBP’ê de hate gotin ku di dema bûyerê de zarokek û jineke ducanî jî di nav malbatê de bûn, malbat li nava kolanê rastî êşkenceyê hat û jina ducanî ji ber lêdanê bi lezgînî birine emeliyata sezaryenê.

Di daxuyaniyê de ev îfade hatin bikaranîn:

“Ev êrîş ne ‘bûyereke edlî’ an jî bûyereke ‘takekesî’ ye. Ev, nîşana dijminatiya sîstematîk e ku li dijî nasname, ziman û hebûna Kurdan li kolanan tê xuyakirin. Şîdeta ku li Bayrampaşayê derketiye holê, encama polîtîkayên nîjadperest ên ku bi salan in têne geşkirin, zordariya polîsan a ku cesaretê ji bêcezatiyê digirin û bêtehamuliya li dijî gelê Kurd e.”

DBP’ê tekez kir ku divê bûyera li Bayrampaşayê tavilê bê lêkolînkirin û ev bang kir:

“Divê ev sûc tavilê bê lêkolînkirin, hemû polîsên ku di êşkence û êrîşê de cih girtine ji kar bên avêtin, berpirsiyar bên darizandin.”