Welatiyên bajarê Qamişlo ji bo piştgiriyê bidin berxwedana gelê Bakurê Kurdistanê meşek lidarxistin. Meşvan li ber çerxeriya Osman Sebrî ya li taxa Hilêliyê li hev civiyan û dest bi meşê kirin.

Çalakgeran alên YPG, YPJ, TEV-DEM, PYD û kongreya Star hildan, pankartên bi nivîsên "Bakur ne bi tena xwe ye" û "Em xwerêveberiya Bakur silav dikin" vekirin û bê navber diruşmeyên dilsoziya bi berxwedana Bakurê Kurdistanê re qîriyan.

Hêzên Asayîşê meşvan parastin û li derdora cihê meşê jî tedbîrên ewlekariyê girtin. Dikandaran jî dikanên xwe girtin û gelek ji wan beşdarî meşê bûn.

Meşvanên ku ji Çerxeriya Osman Sebrî destpêkirin ber bi rêya Xerbî ve bi rêketin û heta Çerxeriya Şehîd Rûbar Qamişlo ya li nêzî navenda Ciwanan meşiyan.

Li vir axaftin hatin kirin. Piştî deqeyeke rêzgiritinê Hevserokê Meclîsa Gel a Qamişlo Feyroşah Remezan axivî û bal kişand ser berxwedana li bakurê Kurdistanê û got, gelê Rojava wê bi hemû hêza xwe piştgiriyê bide berxwedana Bakurê Kurdistanê. 

Paşê Endama Rêveber a Kongreya Star a Qamişlo Henîfe Mihemed axivî û hikûmeta AKP’ê hişyar kir. Mihemed got ku divê dest ji êrîşên xwe yên li ser gelê kurd berde û ev tişt anî ziman: "Gelê me êdî nema sînoran nas dike. Em ê bi hemû hêza xwe li kêleka berxwedana gelê Bakurê Kurdistanê bisekinin.

Meş bi qîrîna dirûşmên dilsoziya bi berxwedana Bakurê Kurdistanê û YPS’ê re bi dawî bû.