Li navçeya Wan Ebexê, piştî ku Walîtiya Tirk par hin gundên li quntara çiyayê Tendurekê weke "herêma ewlekariyê" îlan kir, zexta li gundiyan zêde bû. Li vê herêmê, karê çandinî û xwedîkirina heywanan bi temamî qediya. Gundiyan ji neçarî cih û warên xwe terikandin û li hin herêmên din bi cih bûn.

ÇANDINÎ Û XWEDÎKIRINA HEYWANAN HATIN QEDEXEKIRIN

Lê belê herêmên li derveyî vê "herêma ewlekariyê" jî ji aliyê leşkeran ve hatin dorpêçkirin. Li gundên Burçakalan û Hangedîk û gundikên Kalereş û Tepelî yên nehatin qedexekirin, ji ber zexta leşkeran gundî nikarin çandiniyê bikin û heywanan xwedî bikin.

Leşkerên Tirk hefteya bihurî ji keyayan re gotin, "Gundiyan hişyar bikin, bila pezê xwe neçêrin." Ji ber vê gefa leşkeran, gundî demeke dirêj e nikarin biçin zozanan.

'DIZÎ Û TALANÊ DIKIN'

Gundiyên li ser mijarê ji me re axivîn dan xuyakirin, ku heywanên wan birçîn e û li axuran e. Gundiyan diyar kirin, ku leşkeran çêrgeh û zozan li wan qedexe kirine. Gundiyan dan xuyakirin, ku ji neçarî ew li gorî vê qedexeyê tevdigerin, lê belê cerdevanên ji gundên din, talan û diziyê dikin û pezên xwe li çêrgehên wan diçêrînin. Gundiyan gotin, "Li vî erdê ku milkê me ye, cerdevan pezên xwe diçêrînin. Dizî û talanê dikin."