Li Şirnexê berxwedana xwerêveberiyê ya li hemberî êrîşên qirkirinê di roja 67. de ye. Li Şirnexê ji duh bi şev û vir ve şer û bomberdûman bênavber didomin. Tevahiya şevê taxên Îsmetpaşa, Yenî û Cumhuriyet ji aliyê  wesayîtên zirxî ve hatin bombekirin û şer derket. Li Taxa Cumhuriyetê, gelek mal ji aliyê çeteyên Qesrê ve hatin şewitandin.

Ji duh bi şev û vir ve, taxa Bahçelîevlerê bi obusan ji aliyê Tûgaya Jendermeyan a Çakirsogut ve tê bombekirin. Di navbera çeteyên hewl didin bikevin taxê û hêzên YPS/YPS Jinê de şerekî dijwar diqewime.

Çeteyên Qesrê li gelek avahiyên li derdora taxan bi cih bûne û ji xwe re weke biryargehê bi kar tînin.

Liv û tevgera ambûlansan, ku kuştî û birîndarên hêzên dewleta Tirk rakirin Nexweşxaneya Dewletê ya Şirnexê û 23. Fermandariya Jenderemyan a Sînor, dewam dike.
 
Hem li qada bejahî ya derdora bajêr hem jî li navenda bajêr liv û tevgera balafirên keşfê yên bêmirov û helîkopteran dewam dike.