Di hilbijartinên giştî yên ku li Spanyayê hatin kirin de, rastgir bi ser ketin lê di binê hedefa xwe de man. Serokwezîrê niha yê çepgir Pedro Sanchez di pozîsyoneke baş de ye û dibe ku hikumetê ava bike.
Li gorî encamên hilbijartinên ku roja Yekşemê hatin kirin, Partiya Gel a muhafazakar Alberto Nunez Feijoo bû partiya yekem û 136 parlamenter şandin parlamentoya ku 350 kursî lê hene. Lê tenê tifaqa wî ya potansiyel Vox ê rastgirê radîkal derdikeve pêş. Vox jî 33 kursî bi dest xist. Ji bo hikumetê jî 176 kursî hewce ye û ji ber vê hikumet jî nayê avakirin.
Partiya Gel li gorî hilbijartinên 2019’an 43 kursî zêde kir. Wê 150 kursî ji xwe re kiribû hedef û gelekî di binê hedefa xwe de ma.
Partiya Karkerên Sosyalîst a çepgir jî (PSOE) 122 kursî bi dest xist, tifaqa çepgir a radîkal Sûmar jî 31 kursî bi dest xist.
Li gorî gelek çavdêran ev encam ji bo çepgiran surprîzek e.
Serokwezîrê niha yê sosyalîst Pedro Sanchez û hevrikê wî yê muhafezekar wê vê Duşemê dest bi muzakereyan bikin.
Sanchez pênc sal in desthilatdar e û di pozîsyoneke xurttir de ye. Dibe ku partiyên Bask û Katalanê piştgiriyê bidin Sanchez.
Heke şert û mercên avakirina hikûmeteke koalîsyonê bi hevkariya Partiya Gel û Vox bihatana bicihanîn, wê partiyeke rastgir a radîkal, piştî bidawîbûna dîktatoriya Franco cara pêşîn bibûya desthilatdar.
