Kurdistanî li bajarê Marsîlya yê Fransayê ji bo protestokirina tecrîda girankirî ya li ser Rêberê Gelê Kurd Abdullah Ocalan û bi daxwaza azadiya wî ya fîzîkî, li ber Nûnertiya Parlementoya Ewropayê (PE) çalakiya rûniştinê kirin.

Çalakî di saet 19:00’an de destpê kir û pankartên bi nivîsa, “Ji Abdullah Ocalan re azadî”, “Êrîşên faşîst ên li Kurdistanê rawestînin” û wêneyên Ocalan hatin hilgirtin.

Di daxuyaniyê de ev peyam hate dayîn: “Zêdeyî 2 sal in ti agahî ji Rêber Apo û girtiyên din nayê girtin. Em gelê Kurd vê neheqiyê qebûl nakin. Ji bo bikaribe bi malbat û parêzerên xwe re hevdîtinê bike divê tavilê gav bên avêtin."

Hevserokê Meclîsa Gel a Kurd a Marsîlayê Enes Karliova li vir axivî. Karliova bang li gelê Kurd kir û got, “Heta em nekevin tevgerê wê tecrîda li ser Rêber Apo bidome. Divê em li dora Rêber Apo kom bibin û dakevin qadan.”

Karliova ji bo meşa girseyî ku 22’ê Tîrmehê li bajarê Lozan ê Swîsreyê bi boneya salvegera 100’emîn a Peymana Lozanê bê lidarxistin, banga tevlîbûnê kir û got: “Divê bi hezaran kes di 22’ê Tîrmehê de li hev bicivin û bibin layiqê Kurdistan û Rêber Apo. Karliova diyar kir ku otubusên ji bo meşê 21’ê mehê di saet 23:00’an wê de bi rê bikevin.

Çalakiya rûniştinê bi dirûşmeyên, “Bijî Serok Apo” û “Bê Serok jiyan nabe” bi dawî bû.