Kurdên li paytexta Rûsya Moskowayê, bi taybetî jî civaka Êzidî di salvegera Komkujiya Şengalê de civînek lidar xistin.

Civîna bîranînê li Mala Gelan a Rûsyayê ya li Moskowayê pêk hat û tevî Kurdan, dostên wan tevlî bûn.

Li dû deqeyeke rêzgirtinê ya ji bo bîranîna cangoriyên fermanê, Nûnerê Rêveberiya Xweser a Bakur û Rojhilatê Sûriyeyê Reşad Bênav, Hevseroka Meclîsa Kurd a Moskowayê Rafîke Kamil, ji organîzasyona Jinên Kurd li Moskowayê 'Viyan' Tera Qadir û endamê Meclîsa Moskowayê Andoye Mîşa axivîn û êrişa li ser Êzdatiyê şermezar kirin.

Qisekeran bi bîr xistin ku li Şengalê bi hezaran mirov ji ber baweriya xwe ya Êzdatiyê hatin qetilkirin û diyar kirin ku bi saya HPG, YJA Star, YPG û YPJ'ê hêzên pavşerû DAÎŞ û çeteyên radîkal ên mîna wan li Kurdistanê hatin tunekirin.

Li dijî komkujiyên bi vî rengî jî işaret bi girîngiya rêxistinî û yekîtiyê hate kirin.

Her wiha endama HDP'ê Feleknas Ûca jî bi rêya vîdeo konferansê tevlî civînê bû û destnîşan kir ku li her derê divê helwest li dijî komkujiya li ser Êzidiyan û Şengalê bê nîşandan.